Tashqi ishlar vazirining Xitoy Xalq Respublikasiga tashrifi
14–15-iyul kunlari O‘zbekiston Respublikasi tashqi ishlar vaziri Baxtiyor Saidov boshchiligidagi delegatsiya Xitoy Xalq Respublikasiga tashrif buyurdi. Tashrif doirasida delegatsiya Tyanjin shahrida bo‘lib o‘tgan Shanxay hamkorlik tashkiloti (ShHT) Tashqi ishlar vazirlari kengashi yig‘ilishida ishtirok etdi hamda bir qator yuqori darajadagi uchrashuvlar o‘tkazdi.
Xususan, O‘zbekiston tashqi ishlar vaziri hamkasblari bilan birgalikda Xitoy Xalq Respublikasi Raisi Si Szinpin tomonidan qabul qilindi. Uchrashuvda O‘zbekiston Respublikasi Prezidenti Shavkat Mirziyoyev nomidan samimiy salomlar va ezgu tilaklar yetkazildi. Savdo-iqtisodiy, transport va madaniy-gumanitar sohalardagi hamkorlikni chuqurlashtirish yo‘llari muhokama qilindi, ShHT doirasidagi hamkorlikni mustahkamlash mintaqaviy barqarorlik va taraqqiyotga xizmat qilishi qayd etildi.
Tyanjin shahrida o‘tgan ShHT Tashqi ishlar vazirlari kengashi yig‘ilishida O‘zbekiston delegatsiyasi faol ishtirok etdi. Delegatsiya rahbari o‘z nutqida ShHT-2035 Rivojlanish strategiyasi va Tyanjin deklaratsiyasi ahamiyatini ta’kidlab, O‘zbekiston savdo, transport va xavfsizlik sohalarida amaliy tashabbuslarni amalga oshirishda faol ishtirok etishga tayyorligini bildirdi.
Tashrif davomida Xitoy Kommunistik partiyasi Markaziy qo‘mitasi Siyosiy byurosi a’zosi, Xitoy tashqi ishlar vaziri Van I bilan muzokaralar o‘tkazildi. Tomonlar o‘zaro manfaatli iqtisodiy aloqalarni kengaytirish, mintaqaviy bog‘liqlikni rivojlantirish va ko‘p tomonlama maydonlarda umumiy maqsadlarni ilgari surishni muhokama qildilar.
Shuningdek, Eron tashqi ishlar vaziri Sayyid Abbos Arakchi bilan uchrashuv o‘tkazildi. Tomonlar ikki mamlakatni bog‘lab turgan boy tarixiy merosni qayd etdilar hamda savdo-iqtisodiy va madaniy hamkorlikni yanada rivojlantirish, diplomatik aloqalarni mustahkamlash orqali mintaqaviy tinchlik va barqaror taraqqiyotni ta’minlashga kelishib oldilar.
Bundan tashqari, delegatsiya Xitoyning yetakchi kompaniyalari – Chison Medical Technologies, China Resources Pharmaceutical Group, Norinco, Hangzhou Miuge Chemical Commodities Science and Technologies, Xiamen Tungsten, Shandong Gold, Contemporary Amperex Technology, Great Wall Motor, Origin Quantum va China Aerospace Science and Technology rahbarlari bilan uchrashuvlar o‘tkazdi. O‘zbekistonga ilg‘or texnologiyalarni jalb qilish, kadrlar tayyorlash, mintaqaviy va global yetkazib berish zanjirlariga faol qo’shilish bo‘yicha qo‘shma loyihalarni amalga oshirish istiqbollari muhokama qilindi. Delegatsiya Xitoy biznesining Markaziy Osiyo bozoriga kirish borasidagi samimiy qiziqishini va o‘zaro manfaatli hamkorlikni rivojlantirishga tayyorligini yuksak baholadi.
