Tashqi ishlar vaziri boshchiligidagi O‘zbekiston delegatsiyasi Afg‘onistonga tashrif buyurdi
17-iyul kuni O‘zbekiston Respublikasi tashqi ishlar vaziri Baxtiyor Saidov boshchiligidagi delegatsiya Afg‘oniston poytaxti Kobulga tashrif buyurdi. Tashrif doirasida delegatsiya Afg‘oniston va Pokiston tashqi ishlar vazirlarining birinchi uch tomonlama uchrashuvida ishtirok etdi hamda bir qator yuqori darajadagi uchrashuvlarni o‘tkazdi.
Xususan, O‘zbekiston tashqi ishlar vaziri Baxtiyor Saidov Afg‘oniston tashqi ishlar vaziri vazifasini bajaruvchi Mavlaviy Amir Xon Muttaqiy bilan dastlabki siyosiy maslahatlashuvlarni o‘tkazdi. Uchrashuvda mintaqaviy o‘zaro bog‘liqlik, suv resurslarini birgalikda boshqarish, iqtisodiy hamkorlik, ta’limni qo‘llab-quvvatlash va madaniy merosni tiklash borasidagi intilishlar qayd etildi.
Shuningdek, O‘zbekiston delegatsiyasi Afg‘oniston ichki ishlar vaziri vazifasini bajaruvchi Xalifa Sirojiddin Haqqoniy bilan uchrashib, mamlakatlar o‘rtasida xavfsizlik, huquqni muhofaza qilish va mintaqaviy barqarorlikni ta’minlash sohalarida hamkorlikni yanada kengaytirishga qaratilgan muhim mavzular muhokama qilindi.
O‘z navbatida, Afg‘oniston Ichki ishlar vazirligi tomonidan mamlakatda xavfsizlik bilan bog‘liq vaziyatni sezilarli darajada yaxshilash va giyohvand moddalar ishlab chiqarishga qarshi kurashish borasidagi sa’y-harakatlari yuqori baholandi.
Bundan tashqari, O‘zbekiston Respublikasi tashqi ishlar vaziri Afg‘oniston Bosh vaziri vazifasini bajaruvchi Mulla Muhammad Hasan Oxund bilan uchrashdi. Birodar va qo‘shni Afg‘oniston bilan o‘zaro munosabatlarni yanada chuqurlashtirish, savdo, gumanitar hamkorlik va mintaqaviy bog‘liqlikni rivojlantirish, jumladan, “O‘zbekiston - Afg‘oniston - Pokiston” temir yo‘li bo‘yicha hadli bitim masalalari ko‘rib chiqildi. Bu mintaqaviy integratsiya yo‘lidagi muhim qadam ekanligi ta’kidkandi.
O‘zbekiston hukumati infratuzilma, logistika, energetika va ta’lim sohalarida hamkorlikni mustahkamlashga tayyorligini bildirib, mintaqaviy integratsiyani rivojlantirish maqsadida Afg‘oniston Markaziy va Janubiy Osiyo o‘rtasida ko‘prik vazifasini bajarishi muhimligi qayd etildi.
Tashrif doirasida O‘zbekiston, Afg‘oniston va Pokiston tashqi ishlar vazirlarining birinchi uch tomonlama uchrashuvi o‘tkazilib, o‘zaro ishonch, yaxshi qo‘shnichilik va mintaqaviy hamkorlikni chuqurlashtirish yo‘lidagi tarixiy qadam bo‘ldi. Butun Yevroosiyo uchun strategik ahamiyatga ega bo‘lgan O‘zbekiston – Afg‘oniston – Pokiston Trans-Afg‘on temir yo‘lining texnik-iqtisodiy asosini ishlab chiqish bo‘yicha uch tomonlama hadli bitim imzolandi. Mazkur loyiha savdoni kuchaytirib, Afg‘onistonning iqtisodiy tiklanishini qo‘llab-quvvatlash va janubiy portlar orqali jahon bozorlariga yangi yo‘l ochishiga ishonch bildirildi.
Shu bilan birga, savdo aloqalarini mustahkamlash, qishloq xo‘jaligi, farmatsevtika, to‘qimachilik va qurilish sohalarida hamkorlikni shuningdek, Termiz xalqaro savdo markazidan foydalanishni kengaytirish bo‘yicha umumiy intilishlar e’tirof etildi.
O‘zbekiston xalqaro maydonda Afg‘onistonning mustahkam tinchlik, barqarorlik va umumiy taraqqiyotni ta’minlaydigan mintaqaviy va global jarayonlarga yanada chuqur integratsiyalashuvini ilgari surishda davom etadi.
