O‘zbekiston tashqi ishlar vaziri maslahatchisi BMTning O‘zbekistondagi doimiy muvofiqlashtiruvchisi bilan uchrashdi.
2025-yilning 13-fevral kuni O‘zbekiston tashqi ishlar vaziri maslahatchisi Munira Aminova BMTning O‘zbekistondagi doimiy muvofiqlashtiruvchisi Sabina Mahl bilan uchrashuv o‘tkazdi.
Uchrashuvda O‘zbekiston va BMT o‘rtasidagi ko‘p qirrali sheriklikning dolzarb masalalari muhokama qilindi. Tomonlar so‘nggi yillarda erishilgan hamkorlikning misli ko‘rilmagan darajada yuqori ekanligini mamnuniyat bilan qayd etdilar.
Sabina Mahl BMT tizimining Milliy Barqaror rivojlanish maqsadlariga erishish va “O‘zbekiston-2030” strategiyasi doirasidagi islohotlar dasturini qo‘llab-quvvatlashga sodiqligini yana bir bor tasdiqladi.
BMTning 2026-2030 yillarga mo‘ljallangan Barqaror rivojlanishning yangi asoslarini ishlab chiqish bo‘yicha sa’y-harakatlarni muvofiqlashtirish va respublika uchun ijtimoiy ahamiyatga ega loyihalarni amalga oshirishda kelgusida hamkorlik qilishga tayyorligiga alohida e’tibor qaratildi.
