O‘zbekiston delegatsiyasining Chexiya Respublikasiga tashrifi xususida
Mehnat migratsiyasining yangi yo‘nalishlarini o‘rganish va kadrlar tayyorlash sifatini oshirish maqsadida O‘zbekiston tashqi ishlar vaziri o‘rinbosari Olimjon Abdullayev boshchiligidagi delegatsiya Chexiya Respublikasiga tashrif buyurdi. Mamlakatimiz delegatsiyasi Savdo-sanoat palatasi, Migratsiya agentligi vakillari va tadbirkorlardan tashkil topgan.
Chexiya Respublikasi Sanoat va savdo vazirligida O‘zbekiston Respublikasining Frankfurt-Mayn shahridagi Bosh konsulxonasi tomonidan Chexiya Savdo-sanoat palatasi bilan hamkorlikda Sharqiy Yevropa va Markaziy Osiyo mamlakatlari bo‘yicha tashkil etilgan chexiyalik tadbirkorlar ishtirokida biznes-forum bo‘lib o‘tdi. Muloqot chog‘ida ushbu forumning ikki davlat o‘rtasidagi iqtisodiy hamkorlikni mustahkamlashdagi ahamiyati alohida ta’kidlandi. O‘zbekistonning Chexiya biznesi uchun ishonchli bozorga aylanishga tayyorligi alohida qayd etilib, mehnat migratsiyasi sohasidagi o‘zaro hamkorlikka ham e’tibor qaratildi.
Chexiyaning “Synergie” va “AMBOSELI” rekruting kompaniyalari bilan muzokaralar olib borildi, natijada o‘zbekistonlik kadrlarni, jumladan, avtobus haydovchilari, og‘ir yuk ko‘taruvchi avtomashinalar, teplovoz mashinistlari, IT texnologiyalari va logistika sohasidagi mutaxassislarni Chexiya Respublikasida o‘qitish va ishga joylashtirish bo‘yicha kelishuvga erishildi.
Sharqiy Yevropa va Markaziy Osiyo uchun migratsiya siyosatini rivojlantirish xalqaro markazining mintaqaviy koordinatori Radim Zak bilan uchrashuvda migratsiya sohasidagi hamkorlik, jumladan, mehnat migrantlari uchun sharoitlarni yaxshilash va ularning tashqi mehnat bozorlariga moslashuvi masalalari muhokama qilindi.
Yevropa amaliy fanlar va menejment instituti (EIASM) rahbariyati bilan uchrashuv tashkil etilib, unda O‘zbekistonda IT, moliya, menejment va xalqaro biznes yo‘nalishlari bo‘yicha kasbiy malaka oshirish kurslarini ochish taklifi olindi.
Vatandoshlar bilan muloqot doirasida Pragadagi o‘zbek diasporasi rahbari Dinara Zaxrudinova bilan uchrashuv bo‘lib o‘tdi. Chexiyadagi o‘zbeklar jamiyatini qo‘llab-quvvatlash, madaniy-ijtimoiy tashabbuslarni rivojlantirish, shuningdek, O‘zbekiston fuqarolarini Chexiya Respublikasida ishga joylashtirishga ko‘maklashish masalalari muhokama qilindi.
Tashrif O‘zbekiston va Chexiya o‘rtasidagi ishbilarmonlik aloqalarini mustahkamladi, o‘zbekistonlik mehnat migrantlari manfaatlarini ilgari surish, biznes va migratsiya sohasidagi hamkorlikni kengaytirishga xizmat qildi.
