2022-yil 24-oktabr kuni Oʻzbekiston Respublikasi Tashqi ishlar vaziri Vladimir Norov “Markaziy Osiyo – Koreya Respublikasi” 15-hamkorlik forumida ishtirok etish uchun Markaziy Osiyo davlatlari delegatsiyalari rahbarlari tarkibida Seul shahriga tashrifi davomida Koreya Respublikasi Bosh vaziri Xan Dok Su bilan uchrashdi.

Janubiy Koreya hukumati rahbari Janubiy Koreya va Markaziy Osiyo davlatlari oʻrtasida diplomatik munosabatlar oʻrnatilganiga 30 yildan oshganiga eʼtibor qaratib, bu oʻzaro anglashuv va ishonchning yuqori darajasiga chiqqanini, hamkorlik savdo, investitsiya, ilm-fan va texnologiyalar hamda boshqa sohalardagi faol surʼat bilan ifodalanishini taʼkidladi.

Qayd etilganidek, Koreya tomoni Oʻzbekiston Prezidenti Shavkat Mirziyoyevning 2021-yil dekabr oyida Seulga davlat tashrifi yakunlari boʻyicha erishilgan kelishuvlarni amaliy hayotga tatbiq etishga katta eʼtibor qaratmoqda.

Koreya tomoni ikki davlat oʻrtasida Erkin savdo toʻgʻrisidagi bitimni tuzish boʻyicha muzokaralar jarayonini tezroq yakunlash muhimligini bildirdi.

Tomonlar soʻnggi yillarda chinakam strategik xususiyat kasb etgan sogʻliqni saqlash sohasidagi hamkorlikni yanada rivojlantirish zarurligini oʻzaro taʼkidladilar.

Bosh vazir Koreya kompaniyalarining Oʻzbekistonda tashkil etilgan paxta sanoat klasterlari doirasida toʻqimachilik sanoati sohasida ishtirok etishidan manfaatdor ekanligini qayd etdi.

Xan Dok Suning taʼkidlashicha, Oʻzbekistonda soʻnggi yillarda amalga oshirilayotgan keng koʻlamli demokratik ijtimoiy-iqtisodiy islohotlar, shuningdek, tadbirkorlikni ragʻbatlantirish va ishbilarmonlik muhitini yaxshilashga qaratilgan qonunchilikni takomillashtirish borasidagi saʼy-harakatlar xorijiy investorlar uchun, jumladan, koreyslar uchun ham Oʻzbekiston bozorida oʻz ishtirokini kengaytirishga yaxshi ishoradir.